US-ah music industry a hlawk zel

Recording Industry Association of America (RIAA) chuan nikum, kum 2015 chhung khan US-ah chuan kum 2014 aiin music aṭanga sum lakluh a tam zawk tih a tarlang.

RIAA hian kum 2015 chhunga US-a music industry sum lakluh hi USD tld 7.016 a ni tih a tarlang a, kum 2014 chhung khan USD tld 6.951 a ni thung. Sum lakluh punna hi za zela 0.09 a ni.

Paid subscription aṭanga sum lakluh a pung nasa hle a, kum 2014 khan USD mtd 800.1 a nih laiin nikum kha chuan USD tld 1.22 zet a tling tawh a, a punna hi za zelah 52.3 lai a tling a ni. Digital-a hralh aṭanga sum lut pawh a pung tial tial a, a punna hi za zelah 6.2 a ni a, a pawisa chuan kum 2014 khan USD tld 4.51 a ni a, nikum kha chuan USD tld 4.8 a ni. Digital-a hralh hi music industry sum lakluh za zela 70 zet a ni a, kum 2014 kha chuan 67% a ni.

Streaming a lar tial tial a, sum a lakluh pawh a pung cho tial tial. Kum 2014 khan tluklehdingawn 164.5 zet stream a ni a, kum 2015 kha chuan tluklehdingawn 317 a tling tawh a ni.

Physical format lamah, CD te, vinyl leh DVD-a hralh a kum têlin a kal lo tial tial niin alang. Kum 2014 aia kum 2015-a an hralh tlem zawkna hi za zelah 10.1 zet a tling a, nikuma heng aṭanga sum lakluh zawng zawng hi USD tld 1.9 a ni. CD bika hralh hi a la tam ber reng a, mahse kum hmasa leh lam ai chuan a hniam tawh zawk. Kum 2014 khan CD hralh aṭanga sum lakluh hi USD tld 1.83 a nih laiin nikum kha chuan USD 1.521-ah a tla thla tawh a ni.