Fak hlawh lo hlawhtling Batman v Superman

Critic-ten an fak luai luai hi film hlawhtling tehna ber chu nise Batman v Superman: Dawn of Justice hi film hlawhtling lo pawl tak a ni ngei ang. Mahse box office aṭanga sum hmuh chhuah tam lam hi hlawhtling tehna pawimawh tak a nih si avangin Batman v Superman hi khawvela movie hlawhtling berte zinga mi a ni a, record rawn siam nghal thei zinga mi a ni.

Zack Snyder-a direct film, Batman v Superman hian kar tawp ni thum chhung chauh khan North America aṭangin USD mtd 170 zet lalut a, movie tam tak thla khat lakluh aiin a tam. Hei mai bakah hian ram dangah USD mtd 254 a lalut bawk a, hengte nen hian kar tawp chhung khan USD mtd 424.4 zet lalutin, opening weekend-a khawvel huapa DC movie tihchhuah tawh zinga sum lalut hnem ber a ni der mai.

March thla chhunga movie tihchhuah tawh zingah Batman v Superman: Dawn of Justice hi sum lalut hnem ber a ni a, DC Comics film zinga sum lalut hnem ber a ni bawk. Hei bakah hian opening week-a N. America-a sum lalut hnem parukna a rawn tling ve leh bawk.

Hetiang taka sum lama a hlawhtlinna chhan pakhat chu Imax, premium large-format leh RealD 3-D-a an chhuah man ticket a to vang te pawh ni tho mah se, mipuiin an ngaihlu tihna a ni. Entu zinga zaa 66 chu mipa an ni a, entu zawng zawng zaa 63 chu kum 18 aṭanga kum 34 inkar an ni.

Zootopia chu pahnihnaah a tla thla a, USD mtd 23.1 zet chu a lalut thei a, pathumnaah 'My Big Fat Greek Wedding' awmin, USD td 18.1 a lalut bawk. Palinaah Kristian film, 'Miracles from Heaven' a awm a, Divergent thar ber Allegiant chu pangana a ni.

Box office movies

"Batman v Superman: Dawn of Justice" - $mtd170.1

"Zootopia" - $mtd23.1

"My Big Fat Greek Wedding 2" - $mtd18.1

"Miracles from Heaven" - $mtd9.5

"The Divergent Series: Allegiant" - $mtd9.5

"10 Cloverfield Lane" - $mtd6

"Deadpool" - $mtd5

"London Has Fallen - $mtd2.9

"Hello My Name Is Doris" - $mtd1.7

"Eye in the Sky" - $mtd1