Vohbik Vohbikin an la awm zel
A vawi hnihna atan Vohbik hla 'Jordan lui' chu Hontrade International Ṭhazual Fakna chart-ah pakhatna a rawn hauh leh ta. He hla hi Vohbik member Lalremsangi pasal, Pastor Lalrodinga, thi ta hriatreng nana an siam a ni.
January 18 aṭanga Hontrade International Ṭhazual Fakna chart-a rawn lang ṭan Vohbik hla 'Jordan lui' hi a la lian zel a, pakhatna dinhmunah hian a chuang reng thei ang em tih hriat a har a, top 10-a lang dangte an ṭha a, Mizo Idol aṭanga kan hriat lar Baby Malsawmtluangi'n hma a rawn sawn zel bawk.
Vohbik hian tunhnai khan album 'Halleluiah' chu an tichhuak a, he album hi kum sawm hnua album an tihchhuah leh hmasak ber a ni. Hun rei tak an reh vang vang hnua album an rawn tichhuak hi mi tam tak chuan an album hnuhnung turah an ngai a, tuna an hla hit 'Jordan lui' pawh hi an music video tihchhuah hnuhnung lam turah an ngai a, mahse a ni lo.
Album an tihchhuah dawn khan an member Varsangzuali chuan, "Lalpa'n rem a tih chuan, kan la ti leh ang chu, rawngbawl hna hi chu damchhung daih a nia," tiin a sawi a, chuvang chuan music video dangte pawh kan hmu zel chho ṭan zel a, top 10-ah hian an music video dang 'Ṭawngṭai theihnghilh suh' tih a rawn lang thar. Mizoramah chuan female group kan neih ṭhat leh daihrei an ni a, an thiam viau a, an zai pawhin ngaihthlak a hlawh hle a ni.
Hontrade International Ṭhazualah hian Baby Malsawmtluangi chu palina aṭangin pahnihnaah a rawn invawrh chho a, ani hi hla hit tak tak lo nei tawh a ni a, tuna mi pawh hi a hit chho mek a, pakhatna a hauh ngei a rinawm. Pahnihna aṭangin Grace Lalchhanhimi chu pathumnaah a tla thla a, pangana aṭangin Temi Sailo pathumnaah a rawn invawrh kai thung.
Top 10 aṭangin Estheri Khiangte hla 'I tan ka awm' tih leh, Feli Thangluah hla 'Kei min thlang' tihte chu an tawlh liam a, an aiah Vohbik hla thar leh, Mizo Idol
aṭanga kan hriat Omomi hla 'Kross Kawng' te an rawn tlang thar.
Hontrade International Ṭhazual Fakna 10
1 Vohbik - Jordan lui
2 Baby Malsawmtluangi - Ka hlau lovang
3 Grace Lalchhanhimi - Rorelna ni
4 Temii Sailo - Ka lungawina Isua
5 Emily Vanlaltluangi - Ka zin kawng
6 One in Christ - Ni Thar
7 Pensy- Duhthlanna ruamah
8 Vohbik - Ṭawngṭai theihnghilh suh
9 Mawitei - A thlamuan ang che
10 Omomi Khiangte - Kross kawng