Khiangte Construction Ṭhazual Lengzem: A chung berah Michelle Varte 'Ka Chanpual'

Khiangte Construction Ṭhazual Lengzem chart tharah Michelle Varte 'Ka Chanpual' chuan a chung der dinhmun a luah.

Chuai thei lo, Michelle Varte hian a khat tawkin rimawi khawvel lamah boruak rawn siamin hla hit a rawn nei thei reng a, a music video-te pawh a ulukin, a zai thiam piah lamah thlir manhla tak takin a rawn siam zel a ni. Chart-a pakhatna a rawn nihpui, 'Ka Chanpual' hi October 6-a a tihchhuah kha niin, a hla hi Zaii Hauchhum phuah a ni. Music hi Mangheta siam niin, video hi Samuel Lalrinnunga, JonMizo Visuals, Bilwaif Films-te kutchhuak a ni a, Steve Lalruatkima direct a ni.

Mizo Idol 2022 Hmangaihi chuan a hla thar, 'Mangṭha mai le ' tih chu No 2-ah a rawn chhohpui bawk a, No 1 a la thlenpui ngei a rinawm. Puipuia Chhakchhuak 'Damlai Hringun' pawh No 3-ah a rawn lang a, Apuii 'Nang Nghilh nan' leh HT Lalthanzami 'Hero' te chu Top 5-ah an lang.

Ṭhazual Lengzem Top 10-ah hian Asanga Project, Marshall Fka Fanai, C.Lalremruata, Mary Dawngi leh Olaftea ft Vena Hrahsel-te an lang bawk a ni.