THAZUAL FAKNA: Amtea hun a inher chhuak leh ta

Ṭhazual Fakna chart-ah roreltu thar an awm a, chu chu tudang ni loin 'Ka nghing lo ang' hmanga Zoram mipui min awitu Amtea a ni a, a hla 'Engpawh thleng se' hmangin chart topper a ni. Stacy Punte leh Zorinsanga Sailo-te chuan Amtea thachhang an rawn dawl ve bawk.

Mizo mipa Gospel singer zinga hriat hlawh ber pawl leh zai thiam em em mai Amtea hian 'Engpawh thleng se' hi thla thum liam ta velah khan tichhuakin chart-ah pawh a inlan thuai a, chart hmasaah khan pahnihna niin tunah erawh pakhatna a rawn ni ta a ni.

'Engpawh thleng se' music video hi a changkangin a hmuhnawm a, a hla pawh a mawi piah lamah a thluk a changkang hle a, pakhatna ni awm reng pawh a ni. Engpawh tawk ila, Pathian hmangaihna ata chu tumahin min ṭhen dawn loh zia chu Amtea chuan he hla hmang hian a rawn puang chhuak a, ngaihthlak a manhla hle.

He hla hi sap hla aṭanga Amtea lehlin a ni leh a, Amtea hian ama lehlin ngei hla eng emaw zat a lo tichhuak tawh a, 'Engpawh thleng se' pawh hi chung zinga mi chu a ni.

Ṭhazual award sem zawh chiaha Best New Artist Gospel award dawngtu, Lelte Awards 2020-a New Artist of the Year Gospel award hum hawtu Stacy Punte chu Ṭhazual Fakna chart-ah pahnihna a rawn ni ta a, a hla 'Min thlahthlam ngai lo' hmangin pahnihna dinhmunah a rawn ding. He hla hi chart hmasaah khan pathumna a ni tawh a, ani hian a dinhmun rawn sawh nghet chho zelin pakhatna dinhmuna ding tur pawhin hmabak a nei eng hle niin a lang.

Ṭhazual Award 2020-a Best Male Artist Gospel dawngtu Zorinsanga Sailo 'A Hmangaihna aw' chu pathumna a ni a, a dinhmun a ṭha sawt hle. Lelte Awards pali ngawt la tawh, kumin Lelte Awards-a Gospel Artist of the Year Male dawngtu Sawmtea Chhangte chuan a hla 'Lalpa i chawimawi ang' hmangin palina dinhmun a rawn luah ve leh bawk a ni.

Baby Malsawmtluangi chuan top 5 a rawn khar thung a, 'Ka kawng hruaitu' chu pangana a nihpui.

Ṭhazual Fakna chart top 10-a lang pha chin hi chu an ṭha ṭhin. Tunah pawh hian Mapeka, Sailo Lalsangzuali, Lalthlengliani Jongte, Faktu leh Sanga Renthlei te chu an lang a, anni hian hma an la sawn zel pawh a rinawm.