Thawhlehnaniropuia-A music video pahnihna a rawn tichhuak ta

Nikum November thla khan Krismas music video a tichhuak a, Mizo Idol-a a inlan hnua a video hmasa ber a ni. Kumthar kan kaia Thawhlehna ni ropui taka kan hman liam hnuah Thawhlehnaniropuia music video thar kan hmu ve leh dawn ta.

Thawhlehnaniropuia, Puipuia music video thar hi 'Lalpa fak rawh' tih a ni a, zanin hian Zonet Zawlbukah chanchinthar puan hmain tihchhuah a ni ang. He hla hi Mama, Hnahthial phuah a ni a, Margareth Studio-a record niin, Mspace, Lunglei kutchhuak video a ni.

"Krismas hla ka tihchhuah ai kha chuan ka beisei a sang deuh. Krismas hla 'Ramthlengah, hmun tlawmah' tih hla khan ka beisei a pha chiah lo a, tuna mi erawh hi chu ka chhuang hle," a ti. A hla hrim hrim hi a nalh ka ti a, a thu a ṭha bawk si. A music leh video-ah te pawh ka duh thu a sam hle a ni," a ti.

Tunah hian music video dang pawh a peih leh tawh a, mahse Puipuia hian a la tichhuak rih lo ang. "Tuna ka hla thar tihchhuah hi a boruak te han reh deuh phawt se la, chumi hnuah chuan ka tichhuak leh ang," a ti. A hla tihchhuah leh tur hi engkim peih vek tawh a ni a, a phuahtu chu hla phuah thiam lar Parpuii Chawngthu a ni.

Class X zirlai Puipuia hian kumin chhungin music video tihchhuah nual a tum a, ama sawi dan takin 'a khât tâwkin' a video hi kan hmuh a rinawm. Zaia sawmna a dawng hnem a, kan hma lawkah hian Hmarkhawlian, Cachar, Assam-ah zai tura sawmna a hmuh angin a zin dawn a, hei bakah zaina tur hmachhawp a ngah hle. Zirlai a ni a, zaia sawmna a ngah bawk nen, a zirna nen a intibuai em tih zawhna chu Puipuia chuan, "Tunah rih chuan intibuai lo e," a ti.