Boruak bawlhhlawh vanga thi an tam

Tunhnaia an zir-chiannain a sawi dan chuan kum tinin, khawvel pumah, boruak bawlh-hlawh tak avanga thi hi mi maktaduai 5.5 zet an ni.

Khawvel lum ta zel avangin boruak pawh a bawlhhlawh tial tial a, chu chuan mihring hriselna pawh a khawih pawi nasa sawt hle. Kum tinin boruak bawlhhlawh avang hian mi maktaduai 5.5 zet an thi ṭhin. Hemi thu chhunzawmna chu boruak bawlhhlawh avanga thi zinga a zatve zette hi India leh China-a mite an ni.

India leh China hi nasa takin an ṭhang a, khawl leh hmanraw lamah hma an sawn a, chu chuan boruak bawlhhlawh nasa zawkin a pek chhuahtir a, mipuiin an tuar ta a ni. India leh China hi khawvel pum huap pawha carbon pe chhuak nasa ber ber ram an ni.

Heng ram pahnihte hian power an mamawh hmuh a, thar chhuah nan lungalhthei an hmang nasa hle a, hei vang hian carbon an pek chhuah pawh a pung tial tial a ni. Hetihlai hian India leh China te ei leh bara hma an sawn hi khawthlang ram tan chuan thil lawmawm tak a ni thung. Heng rama mihringte an lo hausa ve tial tial a, chuvang chuan khawthlang ramte chuan an thil siam hralh chhuahna hmun ṭha tak an ni ve ve a ni.

Tunhnaia China pawisa Yuan hlutna tla-hniam ringawt pawhin khawvel puma stock market te a khawih buai pha hial tawh a, hei hian insumdawn tawnna India leh China pawimawhzia a tarlang. Hma an sawnna zelna turah hian power tam tak an mamawh belh zel si a, chuvang chuan India leh China velah chuan boruak bawlhhlawh hian ziaawm lam a pan lawk rih loh hmel.

China-a boruak ti-bawlh-hlawhtu langsar tak chu lungalhthei hâl aṭanga chhuak chhûm chhia (smog) leh mei vâp nawi tê tê an ni. India-ah thung chuan thing tuah khu te, ran êk leh agricultural waste te an ni.