9th Annual Ṭhazual Award 2023 : Song of the Year Gospel-ah ‘Isua a tel ve’

19th Annual Ṭhazual Award 2023 chu zawh fel a ni ta. Ningani zan khan Gospel Award semin, nizanah Lengzem Award sem a ni.

Gospel Award-ah Pathian fakna hla phuahtu lar, tunlaia fakna hla kan neih ṭhat tam tak phuahtu C. Lalzarmawia chuan Best Songwriter award a dawng a, hei bakah hian a hla phuah, Maruati'n thiam taka a sak, 'Isua a tel ve' tih hmangin Song of the Year award an dawng bawk. C.Lalzarmawia hi hemi zana award pahnih hum haw thei awmchhun a ni.

Best Female artist-ah Praise On 2016 winner, a zaithiam zia sawi nawn ngai lo R. Lalrinmawii (Arini) thlan a ni a, Best Male artist award chu tun lai mipa gospel artist zinga mipuia tla na tak, ngaithlak hlawh Jonathan Lianhna in a dawng. Arini leh Jonathan-te hi hemi zan hian an perform bawk a ni.

Best New artist-ah Mizo Idol 2022 aṭanga rawn lar chhuak, Vanlalroluahtumi (Tumtumi) thlan a ni a, Zorema Khiangte chuan 'Ka lawmna ber' tih hmangin Best Music Video a dawng bawk. A music video hi Rinoz siam a ni. Group Duo award chu zaithiam chuai thei lo, RTC Lalduhawmi leh Mizo gospel hmeichhe artist ṭha ber zinga mi Zoramchhani-te inkawpin an dawng a, R Lalhmingmawia (Mapuia) hnenah Best Traditional Artist award hlan a ni bawk.

Beisei lawk angin, host Zonuni Pachuau kaihhruaina hnuaiah Ṭhazual Award-in show hmuhnawm leh ngaihnawm tak min rawn hlui leh ta. Award-a perform artist-te an inbuatsaihna a ṭha a, thlirtute mit leh beng an rawn titlai leh hle a ni.

Gospel Award zanah hian tunlai gospel artist kan neih ṭhat ber berte an rawn perform a, an vaiin an zai ṭhain a ngaihnawm em em vek. Zaia rawngbawlna kawngah pawh thawh hlawk tak, sawm hlawh tak vek an ni a. Award zanah pawh thiam takin, Pathian fakna hla nung takin an rawn sa a, fakna inkhawm nuam tak ang mai niin kalkhawmte leh TV lama thlirtute tan pawh a hlawk thlak hle.