Vanglaini Bihchianna Entrepreneur huang : HoneyDew brand

Mizoram chhunga thei leh thlai thar chhuahte thianghlim taka sawngbawl a, mipuiin ei tur hrisel leh thianghliam an neih theihna atana chhawp chhuaktu, HoneyDew brand chu Vanglaini chuan bihchianna a nei a

Bul ṭan dan:

HoneyDew brand siamchhuaktu, Mizoram Food Processing Research & Training Centre (MFPRTC) hi kum 2015 aṭanga indin ṭan a ni. MFPRTC hi Mizoram food processing lama awmze neia bul ṭantu niin laboratory changtlung tak, Mizorama NABL food testing laboratory awmchhun an ni.

Training programme chi hrang hrang an kalpui a; FPO, self help group, society, college zirlai, farmer, Agriculture University student, food technology student-te hnenah training an pe ṭhin. Kum thum kalta chhungin mi 800 chuang hnenah training an pe a ni. MFPRTC hian nasa takin food research an kalpui a, technology tam tak an siam chhuak tawh.An thil siam chhuah brand hmingah hian “HoneyDew” tih hi an hmang a ni.

An tum ber:

MFPRTC in a tum ber chu Mizorama thlai leh thei thar chhuah, a thar hunlai chauha ei tur leh lei tur awmte a thar hun a pelh hnu, a off-season a mipuiin hrisel leh thianghlim taka an ei theih nana chhawpchhuah a ni. Kan thlai leh thei hi sawngbawl loh chuan hlawkna a awm tak tak loh avangin sawngbawl dan ṭha leh thianghlim mipuite hnena zirtir hi an thupui ber a ni bawk. Thingtlang khaw ṭhenkhatah contract farming hi an kalpui tawh a, nasa leh zuala kalpui an tum.

Thawktu :

MFPRTC hian regular takin mi 18 an chhawr a; food technologist, laboratory analyst, technician, machine opera-tor, processing technician leh assistant bakah helper te an ni. Mamawh changa koh mai theih (casual worker) hi mi 20 vel an nei bawk.

Zawrh chhuah dan :

An thil siamchhuah chi hrang hrangte hi Aizawl-a mart hrang hrangah te, retailer te, restaurant ah te an zuar chhuak. Mizoram pawn lamah NERAMAC nen inthlunzawmin Guwahati, Imphal, Delhi-ah te an zuar chhuak bawk.

Honey Dew product zinga mite’n an lei duh em em chu Dragon Fruit Cider, Dragon Fruit Jam, Tepache Cider, Bamboo shoot ṭin, Baibing ṭin te an ni.

Hmachhawp:

Mizoram thei leh thlai thar chhuah chi hrang hrang, a season mil zela production siam chhoh zel an tum. Technology awlsam zawka thei leh thlai sawngbawl dan farmer-te hnena zirtir te, Mizo mipuiin ei tur thianghlim leh hrisel an neih theih nana food testing lama a tam thei ang ber awareness leh training pek chhoh zel an tum bawk.

Harsatna :

An hma laknaah harsatna hrang hrang an tawk a, sawi sen pawh a ni lo. Mi tam takin an tih peih loh leh tih an tum loh an sutlang a ni. Risk nasa tak an la a, tam tak a hlawhchham a, tam tak a hlawhtling. Tluk leh tlak fawmin vawiin an thleng a ni.

Entrepreneurship (kutkawih eizawnna) chungchang :

Entrepreneurship hi Mizoram economic development ki-pui ber a ni tih pawmtu an ni. Mite zirtirtu nih tlat an tum a, an hnena zirchhuak mi tam takin eizawnna bul an ṭan tawh a ni.