A kum zawna Song of the Year nei thei SaiWanah : Kum 15 hnuah Evenflow an lo lang e

Hla ṭha tak tak a chhuah thar reng karah, Mizoram pum huapa lar chhuak, nunau thlengin an hriat lar neih erawh thil awlsam tak a ni lo. Hetih lai hian kum 23 mi chauh, SaiWanah erawh chuan Zoram deng chhuak thei hla a rawn nei thar thei zel a, Ṭhazual Award-ah a kum zawnin Song of the Year a nei thei ta.

Kum 2022 Ṭhazual Award-ah SaiWanah hian 'Tui leh Mei' hmangin Song of the Year a lo la tawh a, hemi kum hian Best New Artist-ah thlan a ni bawk. Kumin Ṭhazual Award-ah 'Ka pa Khuma' chu 'Song of the Year' ah thlan a ni leh a ni. 'Ka pa Khuma' hla larzia sawi nawn a ngai lo a, he hla hre lo leh la ngaihthla lo chu sawi tur an tam lo ang. He hlaa a thawhpui, Mary Dawngi nen Best Duo/Group of the Year an dawng tel bawk. Kum naupang tea Mizo rilrem zawng hla ṭha leh lar tak tak rawn phuah chhuak thei, SaiWanah hian hla ṭha dang a la rawn phuah belh zel beisei ang.

Mizo band neih ṭhat, Evenflow pawh an teirei peih man a rawn lang ta. Kum 15 hnuah Ṭhazual Award 2023-ah Band of the Year award an hum haw ta e. Award zana an perform pawh a ropui a, mipuite mit leh beng a tlai. An band khaipa, Mangheta Jahau chuan Best Songwriter Award a dawng bawk.

Kumina boruak nei lian, Young Fella chuan a phu ang ngeiin Best Male Artist award a dawng. Young Fella tan kumin hi kum ṭha a ni, a hla tihchhuah thar apiang a hit em em zel a, ṭhalai zingah a tla na hle. Boruak alh hluai nei ngai lo mah se, aw pui leh mawi tak nei, Sangtei Khuptong zaithiamzia kan hre tlang a, eng hla pawh nalh takin a sa thei zel a, Best Female Artist hi ani aia dawng awm an awm bik chuang lo.

Music video hmuhnawm tak tak min hlui ṭhintu, Michelle Varte chuan Best Music Video award lain, ṭhangthar zawkte cho chhuahna atan music video siamna kawngah theihtawp a chhuah ṭhin thu a sawi. Zaithiam naupang zawkte pawhin an zaithiam piah lamah, thlirtute tana beng mai ni lo, mit titlai tel turin music video siam kawngah an ṭan chhoh a duhawm hle.

Ṭhazual Award 2023 Lengzem zana perform - Ruatpuii, Sangteii Khuptong, Lilac, Young Fella, Evenflow, Mary Dawngi ft SaiWanah + Durtlang YMA Zaipawl, Saka & Hmangaihi leh H.O.M (Lude) te che tla thlir a nuam. Zaithiam chauh ni lo, performer dik tak an nihzia an rawn lantir. A hmuna kal khawm leh TV lama thlirtu mipuite lung an ti awi e.