Khiangte Construction Ṭhazual Gospel-ah Cindy-i'n hma a hruai

Khiangte Construction Ṭhazual Gospel chart tharah Cindy Lalthanpuii chuan a hla thar, 'Ka famkim lohna ti famkimtu' tih hmangin hma a hruai.

'Ka famkim lohna ti famkimtu' hi Amanda Joy phuah a ni a, Cindy-i hian a music video hi October 29 khan a ti chhuak a ni. A producer hi Mangheta Jahau niin, video hi Khaso Kheishing & Lalhruaitluanga te kutchhuak a ni. He hla phuahtu hian mihring nun, a tir aṭanga a tawp hretu Pathian chu duhthlan tur pakhat chauh pawh nei se a thlang zel dawn tih a rawn tarlang a, a hla thu a ṭhain a satuin a thiam bawk a, chart hmasaa pathumna aṭangin a chung ber dinhmunah a rawn invawrh chhuak a ni.

Arella pawhin 'Ropui ber' tih chu hma rawn sawnpuiin pahnihnaah a rawn lang a, Dr Zoa 'Fak mai rawh' chu no. 3-ah a rawn lang bawk. Gospel band thar, Lighthouse hla, 'Isu hming mawi ber' chu no. 4-ah awmin, One In Christ chuan 'Eng nge sual tifai thei ang' tih hmangin Top 5 an rawn khar.

Ṭhazual Gospel Top 10-ah hian Zomuanpuia Khiangte leh Mama Khiangte an la lang chhunzawm a, anni bakah Sawmtea Chhangte, Arini Ralte leh Lalthlengliani Jongte te chuan an hla thar an rawn lanpui ve nghal bawk.