Family Worship buatsaih dawn

November 30 (Ningani) leh December 1 (Zirtawpni) zan hian Family Worship chu Dawrpui Multipurpose centre-ah buatsaih a ni dawn a, a vawi khatna atan a duh apiang tan chhim theih a ni ang.

Family Worship hi Mizoram lockdown a nih ṭan tirh khan C. Lalzarmawia te chhung leh a ṭhiante'n bul an ṭan a, Pathianin kawng zau zawk a hawng zel a, Krismas pual nen ṭum sarih lai an lo buatsaih tawh a ni. Tun ṭumah hian ṭum dang ang lo deuhin, mipui a duh apiang chhim theih turin an buatsaih dawn a ni.

Ṭum danga Family Worship buatsaihah chuan C.Lalzarmawia hla thar eng emaw zat phawrh chhuah ṭhin a ni a, kuminah erawh chuan hla thar tel loin, mipuite'n an hla kan lo hriat tawh sa hmanga Pathian fakho tura ruahman a ni. Inbuatsaihna hi thla khat vel kalpui tawhin, Bawmrang Jam room-ah hun hman ṭhin a ni. Mizo gospel artist ṭha ber ber -Pensy, Zoramchhani, Maruati, Hlimhlimi, Ruthi, Zorema Khiangte, Jonathan Lianhna leh Isaac Hnamte te an zai dawn a, mipui zai pawh an hruai nghal dawn a ni. Lalrinmuana leh Dr Dennis Ramdinmawia te'n thuchah tawi an sawi bawk ang.