'Lalpa a ṭha' movie Hindi-a lehlin 'Prabhu Hai Bhala' tlangzarh dawn

M_SPACE production buatsaih,'Lalpa a ṭha" movie Hindi-a lehlin, 'Prabhu Hai Bhala' chu vawiin hian New Delhi-ah tlangzarh a ni dawn.

M_SPACE production leh CONCERN Network, New Delhi-te ṭangkawp chuan 'Lalpa a ṭha' film hi Hindi-in an letling a, kumin kum tir lam aṭang khan buaipuiin, The Groove Studio leh Trans World Radio Studio lamah thla khat chuang dubbing hi buaipui a ni.

Vawiin hian Navinta Retreat House, Okhla, New Delhi-a CONCERN Network meeting-ah film hi premiere a ni dawn a, North India-a CONCERN thawhpui pastor leh missionary-te an kal kawm ang. Anni hian a film hi an rawngbawlna hmun hrang hrangah kengin, a remchan dan angin rawngbawl nan an hmang ang. CONCERN Network chuan film kaltlang hian India ram hmun hrang hrangah rawngbawlna thuk zawk an neih theih an inbeisei thu an sawi.

Mizoramah pawh December 16-ah tlangzarh tum a ni a, Aizawla awm hnam dang rawngbawlpuite nen he hun hi hman tura ruahman a ni. Mizorama tlangzarh a nih hnuah Bawmrang TV-ah a duh apiang en theihin dah a ni ang. 'Lalpa a ṭha' movie original soundtrack "Lalpa a Ṭha" tih hla Lalduhsaki sak pawh Hindi (Prabhu hai Bhala)-a lehlin niin, tihchhuah a ni tawh bawk.

M_Space Production chuan he film Hindi-a dah a nih chhan hi rawngbawlna zau zawk neih nana buatsaih a nih thu an sawi. Ringtute an chêp em em tawh karah film hmanga rawngbawl hi a pawimawh niin an hria a, he film hian Pathian ram zau nan hna a thawh ngei an beisei.