SMIPL Managing Director-in Mizoram tlawh

Suzuki Motorcycle India Private Limited (SMIPL) Managing Director Kenichi Umeda chuan Mizoram a rawn tlawh a, LBS Suzuki buatsaih Sihhmui aṭanga Bawngkawn thleng Access BS6-in petrol a hman dan inelna Mileage Contest, 'A Joyful Christmas Ride with Suzuki' a vai liam. Kum 27 chuang Suzuki sumdawnna huanga tawn hriat nei tawh, Umeda hian kumin April aṭangin SMIPL Managing Director nihna hi a chelh a ni.

India ramah Suzuki motorcyle zuar chhuaktu dealer 550 an awm a, chung zingah chuan Mizoram dealer LBS Suzuki chu tun kum li vel chhung chu hralh tam pahnihna a ni thei. Mizoram bikah tun kum 5/6 chhungin LBS Suzuki hi two-wheeler hralh tam ber a ni bawk a, chawhrualin thla tin Mizorama two-wheeler hralh chhuah aṭanga 50% chuang chu Suzuki a ni.

Mizote'n Suzuki two-wheeler an ngainat avangin Japanese Umeda chuan Mizorama lo kal ngei a duh phah a. Bawngkawn South YMA Auditorium-ah a pualin inkhawm buatsaih a ni. Mizoram a rawn tlawh rualin anmahni hamṭhatna tur piah lamah, khawtlang hmasawn nan eng nge an company-in tih theih an neih ve tih hriat a tum nghal bawk.

November 29, 2014 khan LBS Suzuki-in Mizoramah lirthei an hralh chhuak ṭan a, scooter chi thum Access, Burgman leh Avenis bakah motorcycle Gixxer chi hrang hrang, V-Strom leh Suzuki bike lian leh man to an zuar mek. Kum kaw chhunga hma an sawn dan leh an hnathawh dan avangin Umeda a lawm a, an kal zelna turah duhsakna a hlan nghal.