TNT pual Krismas Charity nei dawn

Lelte Award Organising Committee chuan TNT-a a awm mekte'n hlim leh lawm taka Krismas an hman ve theihna a nih beiseiin, November 30, 2023 (Ningani) zan dar 7:00 hian live concert an buatsaih dawn.

Live concert hi Muanna Veng-a TNT hmunah neih a ni dawn a, Mizorama zaithiam lar mi 40 dawn an rawn che chhuak dawn. He concert hi Zonet leh LPS-te'n a thlawnin Live telecast in an pe chhuak dawn a, Lelte YouTube channel-ah pek a ni bawk ang. Lelte Award Organising Committee chuan mipuite hnenah ṭhahnem ngai taka pawisa fai bakah mahni neih ang tawk, thuamhnaw lum leh ei tur thleng pawha phal taka pe turin an ngen.

TNT hotu ṭhenkhat sawi danin, tunah hian mi sanghnih vel an awm mek a ni. Chawhmeh ei tur an tlachham hle a, anmahni thar chhuah Iskut chu chawhmehah an ring deuh ber a ni.

TNT puala live concert neih tur hi a duh apiang tan a hmunah a chhim theih dawn bawk. TNT tana luangchhuak duh tan Gpay number - 9862373310 / 9862344458-ahte pek theih a ni ang.