Billboard 200: No. 1-ah Drake a rawn kir leh

Billboard 200 album chart-ah Canadian rapper, Drake chu no. 4 aṭangin no. 1-ah a rawn kir leh a, 'For All the Dogs' chu a zawn loin kar hnih a chung berah a rawn awm ta.

Drake hian a studio album pariatna deluxe version, "For All the Dogs: Scary Hours Edition" tih chu a tihchhuah belh leh a, hetah hian hla thar paruk a dah belh a, J.Cole nena an thawh dunna pawh a tel. Hemi hnu, kar liam ta khan "For All the Dogs" hian equivalent album unit 145,000 rawn neiin, chart number 1-ah a rawn invawrh chho leh ta a ni.

Taylor Swift '1989 (Taylor's Version)' chu no. 2-ah a la awm nghet a, equivalent album unit 138,000 a nei. Top 3-ah newcomer rawn awmin, Dolly Parton 'Rockstar' a rawn lang a, hei hi country music singer hian 'Blue Smoke' leh 'Trio' hnua album chart-ah a thlen san ber a ni bawk.

South Korean group, ENHYPEN chuan 'Orange Blood' no. 4-ah an rawn lanpui bawk a, Top 10 chart-a lang thei album pathum an neihna a ni ta. No. 5-ah hun rei tak chart luah lumtu ni tawh, Morgan Wallen 'One Thing at a Time' a lang chhunzawm leh.

Billboard 200 album chart Top 10-ah hian Taylor Swift album dang pathum, 'Midnights', 'Lover' leh 'Folklore' an lang a, Stray Kids 'ROCK-STAR; leh SZA 'SOS' te an lang bawk a ni.