Amazon miniTV-ah Nunui Rualhleng channa 'Ishqyapa'

Mizo model lar, Nunui Rualhleng channa, romantic series 'Ishqyapa' chu Amazon miniTV-ah December 1 hian tihchhuah a ni dawn.

JAR Pictures siam, 6-episode drama hi India rama culture leh region inang lo tak aṭanga seilian, Punjabi tlangval, Vikram (Paramvir Cheema) leh Mizo nula, musician Puii (Nunui Rualhleng) te inkara inṭhianṭhatna leh inhmangaihna, chhungkaw pawimawhna leh society thil thlirdan te, harsatna hrang hrang an paltlang chhoh dante tarlan a ni. Hindi-a siam niin, director hi Sandeep Varma a ni a, producer hi JAR Pictures bakah Ajay Rai a ni.

Amazon miniTV hi Amazon shopping app-ah a awm a, Playstore aṭangin install theih a ni bawk. 'Ishqyapa' hi a thlawn vekin a en theih dawn a ni.