Jungkook leh Usher thawk dun dawn

BTS Jungkook chuan a hla, 'Standing Next to You' remix-ah Usher a thawhpui dawn.

BIGHIT MUSIC chuan nimin khan Jungkook-a'n American singer, Usher a thawhpuina remix thar hi December 1-ah tlangzarh a ni dawn tih a puang. Jungkook hian a original version hi Billboard Chart hrang hrangah a lo lanpui tawh a ni.

BTS hian an hla hit, 'Butter'-ah Usher hming hi an lo tilang tawh a, “Don’t need no Usher/To remind me you got it bad.” tih thu an hmang a ni. He hla an release khan Usher pawhin a lawmzia lantirin, he hla a sakpuina video-te pawh a lo post tawh bawk.

Jungkook hian BTS member dang - RM, Jimin leh V-te nen December thla laihawl hian mandatory military service zawm an tum tawh niin report chuan a tarlang a, RM leh V hian December 11-ah training centre zawmin, Jimin leh Jungkook hian a tuk December 12-ah an zawm ve ang.