Spotify Top Artist 2023-ah Taylor Swift 2023-a hla stream nasat ber 'Flowers'

Music streaming service, Spotify chuan Nilaini khan end-of-year wrapped data a tichhuak a, Taylor Swift chu kumin chhunga US bakah khawvel pum huapa stream ngah ber niin, year-end artist global chart-ah a chung ber a nih ṭum khatna a ni nghal bawk.

Khawvel pum huapin Swift hian Spotify-ah stream tld 26.1 chuang a nei a, nikuma chart leader Bad Bunny a rawn khum. Bad Bunny hian kum thum chhung stream ngah ber a nih hnuah, kuminah pahnihnaah a tla thla ta a ni. Artist stream ngah zual panga zingah hian The Weeknd, Drake leh Peso Pluma te an lang bawk a ni.

Taylor Swift hian Spotify’s Global Top Artist, 2023 a nih lawmna pual hian streaming service-ah hian a hla, 'You're Losing Me (From the Vault)' a rawn dah chhuak thar nghal a ni. He hla hi a hmain Eras Tour-a hralh chhuah, exclusive CD-ah chauh a dah.

Kum 33 mi, singer-songwriter Swift tan kumin hi kum ṭha a ni. Eras tour a neihna aṭangin USD mtd 900 a la lut tawh. Kuminah hian US, Mexico leh South America-ah concert ṭum 66 a nei a, kumin atana Eras tour kharna chu Pathianni khan a nei. Eras tour hi khawvela tour neihna aṭanga sum lak luh tamna ber a ni dawn niin Billboard chuan a chhut. Nakkuma Eras Tour a zawh hunah, tour aṭanga a sum lak luh hi USD tld 1.6 - 1.7 tling chho turah an ngai.

Hetih lai hian khawvel huapa kumin chhunga Spotify-a hla stream nasat ber chu Miley Cyrus 'Flowers' a ni a, he hla bik hian stream tld 16.1 zet a nei. Hla stream nasat zual zingah hian SZA 'Kill Bill', Harry Styles 'As It Was', Jungkook 'Seven (feat Latto)' leh Eslabon Armado & Peso Pluma 'Ella Baila Solo' te an lang bawk a ni.