Lersia Play Top Chart: November-ah 'Ambush' hralh hnem ber

Mizo film stream app, Lersia Play aṭanga November thla chhunga film hralh hnem ber chu Ambush a ni.

'Ambush (A War Story) hi Mizo film zinga budget sang ber niin cheng nuai 30 vel an seng. October 5-ah tlangzarh a ni a, hun eng emaw chen show anga kalpui a nih hnuah November 3 khan Lersia Play-ah lei theiha dah a ni. Mizorama film siamtu zinga hriat hlawh leh chungnung bera ngaih, Mapuia Chongthu 'Leitlang Pictures' kutchhuak a ni a, scriptwriter hi Dr Zarzosanga niin, screenplay hi Nuna Hrahsel a ni. 1966 Mizoram independent movement behchhana siam niin, a changtute hi Sangtea Chhangte, Marilyn Chhanchhanin, Sena Ngente, Gilbert Colney, R.Lalnuntlunga leh Eddite Tochhawngte an ni a, English leh Mizo sub-title dah tel a ni.

November thla chhunga film hralh chhuah tam ber dawttu chu Mastea channa, Rinkson Entertainment buatsaih 'Archangkawm 2' a ni. Archangkawm hi April khan an tichhuak tawh a, an hlawhtlinpui hle a, a chhunzawmna hi an siam leh a ni. 'Archangkawm 2'-ah hian Lalnuna leh Lalmuan-te bawk kan hmu leh a, Pa Hmuna an tihbuai dan hrang hrang, thawnthu tawi pathum angin an ṭhen. 'Archangkawm' pawh hi November-a film hralh chhuah tam paruknaah a lang pha bawk.

Film hralh tam top 3-ah film thar, 'Val Senior' a rawng lang bawk. Elza Chongthu, Elza TV Production kutchhuak, 'Val Senior'-ah hian amah Elza Chongthu hi a changtupa angin a inlan nghal a ni. Ṭhatea Ralte chu director of photography niin, scriptwriter hi Chhantea (Mathew-a pa) a ni. November 10-ah Lersia Play-ah chhawp chhuah a ni.

Rise of the Heroes chuan Top 5 a rawn khar. He film hi rambuai laia CH Battalion-ho chet dan tarlanna a ni. A changtute hi Mizo ṭhalaite zinga hming chher sa, Timothy Vangchhia leh VL Ruatzeli te an ni. B.Vanlalṭana produce a ni a, director hi Lalmuankima Khiangte niin, cinematographer hi BS Pictures a ni. Lersia Play-ah November 17 khan dah a ni.