Khiangte Construction Ṭhazual Lengzem : Pakhatna hauhtu Hmangaihi ‘Mangṭha mai le’

Ṭhazual Award 2023-a best new artist dawngtu, Mizo Idol 2022 T. Vanlalhmangaihi chuan a zaithiamzia a lantir zel. Khiangte Construction Ṭhazual Lengzem chart tharah a hla, 'Mangṭha mai le' tih chu pakhatna dinhmun a rawn hauhpui ta.

'Mangṭha mai le' hi Dr Albert Vanlalliantluanga phuah a ni a, audio leh video hi Aeris Records kutchhuak niin, projek_liantluang produce a ni. October 7 khan Hmangaihi hian he hla hi a tichhuak a, a hla a nalh a, a satuin a thiam bawk a, tihchhuah a nih aṭang hian chart-ah a rawn lanpui thei nghal a ni. Hma rawn sawnpui zelin, a chung ber dinhmun a luah thei ta a ni. Hmangaihi zaithiam zia kan hre tlang bawk a, no. 1-a awm pawh a phu hle.

Puipuia Chhakchhuak, 'Damlai hringnun' chu no. 2-ah a rawn lang bawk a, Puipuia hian a hla dang pakhat, ama phuah 'Lunglen hnemtu' chu Top 10-ah a lanpui thei bawk. Apuii Chhangte, 'Nang nghilh nan' chu no. 3-ah awmin, rapper Marshall Fka Fanai hla 'Ka duhaisam' chu no. 4-ah a lang a, tunlaia boruak nei lian tak Mary Dawngi chuan November thlaa a tihchhuah, 'Se bo hnu' hmangin Top 5 a rawn khar.

Ṭhazual Lengzem top 10-ah hian Olafte ft Vena Hrahsel, Mizo Idol 2022 intihsiakna aṭanga hriat hlawh chho Saka bakah, zaithiam chuai thei lo Ngurthangvela leh Mawimawia te an rawn lang bawk a ni.