Eddie Pachuau 'Lairil hmangaihna' a chungnung ber

Ṭhazual Lengzem chart-ah rorel­tu thar an awm a, Eddie Pa­chuau 'Lairil hmangaihna' chu pakhatna a ni a, Mimi Rem­ruat­sangi 'Vul zel rawh aw' chu pa­hnihna niin Michelle Varte 'Chawng­­tinleri' chu pathumna a ni bawk.

Michelle Varte hla sak 'Chawng­­tinleri' chuan chart hnih lai a zawna ro a rel hnuah nek chhuahin a awm ve ta a, Eddie Pachuau 'Lairil hmangaihna' chu pakhatna a ni ve thung. Eddie-a hian 'Lairil hma­ngaihna' hi April thla tir lamah khan YouTube-ah a dah chhuak tawh a, chart hmasaah khan pahnihna niin, Ṭhazual chart-ah hian a mikhual tawh lo hle a, tunah chuan tluk thei an awm ta lo. He hla hi ama phuah a ni nghe nghe a, music video pawh hmuh a nuam hle a ni.

Chart No.1 pawh lo ni tawh Mimi Remruatsangi 'Vul zel rawh aw' chu pahnihna a ni a, ani hi Ṭhazual chart-ah hian dinhmun ṭhaah a ding rei tawh hle. Pakhatna a nih tawh piah lamah hian top 5-ah a lang rei tawh a, pahnihna leh pathumna dinhmunah a din chhawk zak zak a ni ber.

Michelle Varte 'Chawng­tinleri' chu a zawna pakhatna  anih hnuah pathumna a ni ve leh ta a, music video changkang tak leh hla dangdai tak 'Chawngtinleri' hi dinhmun ṭha berah a rawn invawrhpui leh thei dawn em tih chu hriat a chakawm hle.

Top 5-ah Fela Colney ft. Temami 

Pakhatna hial pawh lo ni tawh Didika Chhakchhuak 'I bei reng si' chu palina a ni a, Fela Colney ft. Temami 'Beisei bo' chu top 5-ah a rawn inhlangkai ve leh ta bawk. 'Beisei bo' hi chart-ah a inlan rei ve leh tawh a, dinhmun sang lam pan zel thei tur pawhin hmabak a nei eng hle niin a lang.

1    Eddie Pachuau     - Lairil hmangaihna

2    Mimi Remruatsangi     - Vul zel rawh aw

3    Michelle Varte     - Chawngtinleri

4    Didika Chhakchhuak     - I bei reng si 

5    Fela Colney & Temami     - Beisei bo

6    Rohlupuii     - Her sual lo

7    Empy     - Ṭhapui

8    Jaui     - I tan chauh

9    Rualthana     - I tan

10    Hoxy     - A beidawng lo