The Crown-ah Elizabeth Debicki-in Lady Diana lem chang dawn

Australian actress Eliza­beth Debicki chu Netflix series The Crown season hnuhnung pahnihah Princess of Wales, Diana lemah a chang dawn.

The Crown season 4 hi kumin favangah hi chuan tlangzarh hman an tum a, hetah hian Emma Corrin chu a inlan tawh dawn lo a, Elizabeth Debicki hian a ai a awh tawh dawn a ni. Jonathan Pryce leh Imelda Staunton-te bulah Debicki hi a chetla ve dawn tihna a ni a, season tawp pahnih hi 90's tawp lama thil thleng angin an chan beisei a ni bawk.

The Crown official Twitter account-in thu­chhuah an siamah chuan Debicki chuan Princess Diana thlarau, a thusawi leh a cheziate chu mi tam tak thinlungah a la cham reng tih a sawi a, The Crown series-a a inlan ve tur chu chawimawina nia a ngaih thu a sawi a ni.

Kum 29 mi Elizabeth Debicki hi The Great Gats­by leh Guardians of the Galaxy Vol 2. aṭangte khan movie lam tuipuite chuan kan hre ṭheuh tawhin a rinawm a, Diana lem a channa tur season-ahte hian  Princess Diana leh Prince Charles' inneihna sukuk chhoh dante leh kum 1997-a a thih dan chungchangte pawh tihlan a ni dawn.

Tunhnai lawk khan Oscar-nominated actor Jonathan Pryce chuan Prince Philip lem a chang dawn tih tarlan a lo ni tawh bawk a, Lesley Manville chuan Princess Margaret lem chang dawnin Imelda Staunton chuan Olivia Colman thlakin monarch lemah a chang dawn tih puan a lo ni tawh bawk.

Elizabeth Debicki hi kumina film tlangzarh tur zinga thawm nei ring ber tih ngam Tenet-ah pawh a chang dawn a, TV series lamah pawh hian The Crown a chan hman hian sulhnu a nei nual tawh bawk a ni.