Box Office : No. 1-ah Beyonce concert film

North American box office-ah kumin chhunga tour hlawhtling tak nei, Beyonce Knowles concert film, "Renaissance: A Film by Beyonce' chu a chung berah a rawn lang.

He documentary concert flim hi Beyonce direct leh produce a ni nghal bawk a, AMC theatre hrang hrangah tihchhuah niin, tlangzarh karah hian US-ah USD mtd 21 a la lut. Critics lam review pawh a hmu ṭha viau a, CinemaScore-ah audience pawhin A+ an pe bawk.

'Renaissance' film hi concert film che ṭha ber zingah tel mah se, a hmaa lo tih chhuah tawh, Taylor Swift concert film, 'Taylor Swift: The Eras Tour' erawh a pha lo hle. Eras Tour film hian tlangzarh karah USD mtd 92.8 a la lut thei a ni. Beyonce leh Swift hian an film siamna atan hian AMC theatre chu inremna an siampui zawk a, superstar pahnihte hi an inṭawiawm ṭha hle a, an film premier-naah hian an inkal tawnsak ve ve a ni.

Kar hmasa lama box office champion, "The Hunger Games: The Ballad of Songbirds and Snakes" ticket sale chu 50% zeta tlahniamin, no. 2-ah a tla thla a, a kar thumnaah hian USD mtd 14.5 a la lut. Hetih lai hian tlangzarh thar, Japanese film 'Godzilla Minus One' chu Top 3-ah a rawn lang a, USD mtd 11 la lutin, ticket leitu zinga 77% zet hi ṭhalai leh kum naupang zawk an ni.

'Trolls Band Together' chuan USD md 7.6 lak luh belhin no. 4-ah a awm a, 'Wish' chuan Top 5 a rawn khar a, kar liam ta chhung khan USD mtd 7.4 la lut lehin, North America bika a sum lak luh hi USD mtd 42 a tling tawh.