Suicide Squad game thar tur hming Suicide Squad: Kill the Justice League

Kar hmasa lamah khan Batman: Arkham Knight game siamtu Rocksteady Studios chuan Suicide Squad game an siam dawn tih an tarlang a, thuchiang erawh an tarlang lem lo.

Tunah erawh kar hmasa lam aia chiang zawkin an rawn thailang leh ta a, an game tihchhuah thar tur chu Suicide Squad: Kill the Justice League tih a ni dawn. Kum 2017-a tihchhuah Justice League vs. Suicide Squad limited comic series zulzuiin an game thar tur hi an siam dawn a ni mahna!

Warner Bors chuan Suicide Squad game thar tur title hi an puang chiang tawh a, tunah hian he game hi an la siam mek chauh a, August 22 aṭanga neih tur DC mega virtual convention neih tur  DC FanDome-ah hei aia chiang zawk hriat belh tur hi a la awm mai thei bawk.

DC Fandome-ah hian Arrested Development leh BoJack Horseman vanga miin an hriat lar Will Arnett chuan minute 20 chhung Suicide Squad: Kill the Justice League panel a host dawn a, hetah hian a game kalphung tur eng emaw chen chu a hriat theih ang.

Kum thum liam taah khan DC Comics chuan issue paruk lekin  Justice League vs. Suicide Squad an tichhuak a, he series-ah hian villain Eclipso chuan Batman rilru thununin supervillain team-te nen hian Justice League member-te an bei a ni. Tuna Suicide Squad game thar tur pawh hi helam hawi hi a nih ring an awm nual.

Batman: Arkham developer Rocksteady Studios hian DC Comic game hi an siam nual tawh a, Batman: Arkham series pawh kha an kut chhuak vek a ni. DC Fandome-ah hian  Suicide Squad: Kill the Justice League panel bik hi August 23, Pathianni zing dar 5:40 aṭangin an ṭan dawn a, en tum kan awm a, a hma deuh kan ti a nih pawhin chhun dar 1:40-ah leh zan dar 9:50-ah an pe nawn leh ang. En tum chuan chiang zawkin DC Fandom website lamah a ngaihven theih ang.