Pathian tana rawngbawl turin Daddy Yankee inpe

Puerto Rican singer/songwriter Daddy Yankee chuan December 5-a farewell tour 'La Meta 'The Goal' kharna a neihnaah, reggeton artist a nihna chawlhsanin, Pathian tana rawngbawl hna a thawk tawh dawn tih a puang.

'Gasolina' hitmaker hian a Instagram lamah pawh a thusawi hi a post zui bawk. "Ka tan he ni hi ni pawimawh ber a ni. Zanin hian khawvel hriatah Krista chu keimahah a nung a, a tan ka nung ve tawh dawn tih puan chhuah hi ka zak lo a ni," tiin a nuna chapter pakhat hun a tawp a, chapter thar a rawn inṭan ve ta thung a ni, a ti. Kum 46 mi, Daddy Yanke hian Kristian sakhua a rinna leh, hemi atana a hun pum pek a tum chhante sawiin, 'Kum tam tak kan nunah thil kim lo tihfamkim dan zawngin kan buai ṭhin. Vawi tam tak a chhan hriat tumin ka bei a, ka hlim viau lai pawhin keimahah hian kim lo a awm tlat tih ka hre ṭhin," tiin, famkimna chu Isua Krista-ah a hmu tih a sawi. Hei vang hian Krista hnung zuiin a rawng a bawl tawh dawn a, a laiah hming Ramon Ayala tih chu a hmang tawh dawn tih a sawi bawk.