DC Film-ah Henry Cavill a let leh dawn

Khawthlang media ṭhenkhat report hi a dik a nih chuan Henry Cavill Superman kan hmu leh dawn niin a lang a, DC Comic fan-te tan chuan thu lawmawm tak a ni ngei ang.

DC Movie tihchhuah thar leh turah Man of Steel kan hriat ṭhin kha kan hmu leh mai thei a, mahse tuna production an ṭan tawh DC film hoah erawh a inlan rih dawn lo.

Henry Cavill DC Film-a a let leh tur chungchang hi Deadline chuan a tarlang hmasa ber a, hemi hnu lawk hian Variety pawhin a tarlang ve leh a ni. Deadline leh Variety hi khawthlang lam entertainment media-te pawhin news source atana an rin ber zinga mi an ni ve ve a, chuvang chuan an report hi a dikna chance a sang hle. An report tarlanah hian The Batman-ah erawh a inlan a beiseiawm loh thu an tarlang tel.

Warner Brothers picture lam chuan hemi chungchangah hian thuchhuah an la nei lo a, Cavill thupuangtu lam pawhin thuchhuah an la siam lo bawk. Heti chung hian DCEU fan-te chuan an ngaihven hle thung.

Kum hnih dawn liam taah khan Warner Bros. leh Henry Cavill-te ṭhenna biahthu inhlan thu khan media hrang hrang a luah hneh hle a, Cavill ngei pawhin  Mission: Impossible – Fallout vang a nih thute pawh a lo sawi lang tawh a nih kha.

Nikum December khan Cavill hian Superman suit a ha leh thut thei tih hi a lo sawi thawi tawh a, Men's Health-in an interview-naah Superman cape chu a closet-ah a la inkhai reng tih leh a ta a la nih reng thu sawiin, a role chu la bansan lo a, Superman chuan rorelna dik kenkawh tur a la ngah hle niin a lo sawi zauh tawh.

Cavill comment aṭanga a lan dan hi chuan Superman film puitling danga inlan a hreh lo hle niin a lang a, DC Comic film buaipui mek-  Black Adam, The Flash, Shazam! 2, leh Aquaman 2-ahte a inlan dawn em tih erawh a la chiang lo.

DC Comics movie buaipui mekteGal Gadot channa Wonder Woman 1984 leh The Suicide Squad-te chu chan zawh a ni tawh a, Robert Pattinson channa The Batman chu hripui leng vangin production chawlhsan lailawk a ni rih bawk. 

Dwayne Johnson channa Black Adam, Ezra Miller channa The Flash bakah Shazam! 2 leh Aquaman 2-te chu thawm nei ring anni mek bawk a, Wonder Woman 1984  leh The Suicide Squad-ahte hi chuan Cavill hi a inlan dawn lo tih a chiang tawh a, hetihlai hian film dang hoah hian a inlan dawn em tih erawh kan nghak anga, kan la hre mai dawn niin a lang. Khawthlang media ṭhenkhat report hi a dik a nih chuan DC Entended Universe bulṭantu hi a khawvel ngaiah a let leh dawn a ni.

Man of Steel     - 2013

Batman v Superman: Dawn of Justice     - 2016

Justice League    - 2017