Time 'Person of the Year' Taylor Swift: Athlete of the Year-ah Lionel Messi

Kum ṭha hmang mektu, Eras tour hmanga record hrang hrang siamtu, American singer-songwriter Taylor Swift chu Time Magazine chuan 2023 'Person of the Year' atan a thlang.

Time Magazine chuan kum 33 mi, Swift hi Person of the Year cover-a ṭum hnih lang thei hmeichhe awmchhun a ni tih an tarlang bawk. Kum 2017 khan Silence Breakers zinga pakhatah puan niin, Person of the Year cover-ah a lo lang tawh bawk a ni.

Time chuan finalist pakua aṭangin Person of the Year atan Swift hi a thlang chhuak a, finalist zingah hian Barbie, Xi Jinping, King Charles III leh OpenAI chief Sam Altman-te pawh an tel.

Kumin chhungin Taylor Swift hian kawng hrang hranga record siamin, headline a luah chho reng a ni. Eras Tour a neih chu khawvela tour sum la lut tam ber ni tura ngaih a ni tawh a, hei bakah concert film a siam, 'Taylor Swift: The Eras Tour' chu box office lamah a chet ṭhatpui zui hle bawk. Eras tour hi nakkum December thleng a nei dawn a ni. Spotify chuan kumin chhunga artist play hlawh ber, stream tam berah a lo puang tawh bawk.

Time hian CEO of the Year atan Sam Altman thlangin, Athlete of the Year 2023-ah Lionel Messi an thlang bawk a ni.