Plastic surgery hmangah Hailey Bieber puh

Beverly Hills plastic surgeon Dr. Daniel Barrett chuan a TikTok video-ah Justin Bieber-a nupui Hailey chuan a hmaiah plastic surgery a hmang tih a sawi a, hemi vang hian Bieber-te nupa hian a laka thubuai siamsak an tum.

Dr. Daniel Barrett hian video a tihchhuahah hian kum 2011 leh 2016-a Hailey thlalak a tarlang a, a hnar chu enchiang turin a follower-te a hrilh a ni. A khabe-a tihdanglam thute, laser skin tightening a hman thute, a biang leh a hmui a tihdanglam thu leh genioplasty a hman thute pawh a sawi a ni.

Hailey chuan chhanglet nghalin a hmai a tihdanglam loh thu a sawi a, a thlalak chu makeup artist-te chei hnua a lak a nih thu leh kum 13 a nih lai leh tun hun chu khaikhin chiah a ngaih loh thu a sawi. Hailey-te nupa hian hemi chungchangah hian thuchhuah siamin Dr. Daniel video tihchhuah chu delete turin an hriattir a, he video-ah hian Justin-a hla Sorry track a hmang nghe nghe a, he hla hi copyright protected lyrics a nih avangin thil dik lo a ti niin Justin-te nupa hian an sawi bawk.

Dr. Daniel hian a video tihchhuah hi delete a tum loh thu a sawi bakah, he video hi plastic surgery chungchanga inzirtirna leh a ngaihdan a sawichhuahna atan a hman thu a sawi.