Mizoram-a Force Motors dealership hawng

Mizoramah Force Motors dealership vawi hnih tihtawp ni tawh mah se automobile lama tawn hriat nei tak LBS Group chuan la lut thar lehin, Inrinni khan Bawngkawn South YMA Hall-ah Force Motors Limited President Rakesh Maru chuan dealership a hawng.

Maru chuan LBS Motors chungah rinna an nghat tih a sawi a, hlawhtling taka an kalpui theih nan service, spare part leh traning lamah an pui dawn tih a sawi.

LBS Motors Managing Board hotu, H. Ngurdingliana Ngurte chuan Force Motors-in Mizoram dealer ni tura an ngenna an hnawl hnuah intiamkamna ṭha tawk nen inremna an siam tih sawiin, "Kum 2019 khan kan indawr tawh a, mahse, kum li hnuah kan puitlin thei chauh a ni. Central Scheme aṭangin Mizoram Veterinary Department hnenah ambulance 28 kan hralh tawh a, heta hlep kan neih hmang hian dealership kan hawng thei chauh a ni," a ti.

LBS Group hian November 29, 2014 khan Mizoramah Suzuki two-wheeler dealership hawngin, September 28, 2022-ah Kia car dealership an hawng leh a, Force Motors hi automobile lama dealership hrang pathum an hawnna a ni.

Force Motors hi Light Commercial Vehicles (LCV) leh Multi Utility Vehicles (MUV) siamtu an nih bakah Sports Utility Vehicles (SUV) an siam tel bawk. India rama Van siam chhuak hnem ber an ni a, an lirthei zingah SUV fak hlawh tak Gurkha phei chu Indian Army-in hmangin an leisak tam tawh hle. Tunah hian Traveller (bus chi hrang hrang), Trax (cruiser, ambulance, delivery van), Citiline, Gurkha leh Urbania bakah tractor an zuar chhuak mek a ni.