Remthanga channa film en theih ta

Mizo ten film star kan neih lar zinga mi K. Lalremthanga chu film industry-ah a lo kir leh ta a, a channa 'Nun Hi Eng Nge?' tih chu Lersia Play app-ah en theihin a awm ta.

Remthanga hi lemchan khawvela Mizo te 'legend', ennawm hmuhnawm tak tak min hlui hmasa tute zinga mi a ni. Hun rei tak a chawlh hnuah, a rawn come back leh ta a ni. Tun tuma a channa hi Kristian movie a ni a, mahse, action leh romance lungrun tak a tel leh e!

Lemchan khawvela Mizo mi hmasa te - B. Lalthlengliana (Thangkura), Lalzidinga, Lalngaihsaka leh mi dangte pawh he film-ah hian hmuh tur an awm. Main role play-tu, director ni nghal bawk Remthanga hi tunah chuan rawngbawltu pastor a ni tawh a, film pawh hi hun chep tak kara a buaipui a ni.

He film hi kum 1994 bawr vela Mizorama chhungkaw pakhat chanchin behchhan (true story based) a siam a ni. Chhungkaw nu ber chuan sum leh pai lama harsatna avangin a pasal leh fanau pawmlaite a kalsan a, mahse a beisei ang a lo ni lo a, chhanchhuah ngaiin a awm ta zawk si. Nung damin a haw thei ang em? Engtin nge ni zel dawn? Han en phawt mai teh le.