Ellie Goulding Album thar chungchang a chiang ta

Hun eng emaw chen a album thar tur leh a chhehvel chungchangah neuh neuh hriat tur a awm hnuah tunah chuan a album thar tur title, tlangzarh hun tur leh a thawhpuite a chiang ta.

Ellie Goulding studio album palina tur hian thawm a neihna a rei tawh a, chuti chung chuan thuchiang hriat tur a awm lawk lo a, mahse tunah erawh a chiang ṭan ta e. July 17 hian a tlangzarh dawn a, a album title chu 'Brightest Blue' a ti dawn bawk. Part hnihah a ṭhen hrang dawn a,  Brightest Blue leh EG.0 tiin a dah hrang a ni.

English singer huhang ngah tak hian a album thara part hmasa zawkah hian track 13 a dah dawn a, part hnihna EG.0-ah hian track panga a dah dawn bawk.

Brightest Blue hi ṭhanlenna lam leh hmeichhe puitling nihna lam hawi a nih thu a lo sawi tawh a, tunhnai lawka a tlangzarh 'Power' pawh kha a tel dawn. He album-a mi, 'Start'-ah hian Serpentwithfeet a thawhpui a ni.

EG.0-ah hian mi hrang hrang a zaipuina a dahkhawm deuh thung a,  Juice WRLD, Diplo, Swae Lee, Blackbear leh Lauv a zaipuinate a awm.

Ellie Goulding hian lockdown lai pawhin thawm a nei fo a, Global Citizen’s charity livestream One World: Together At Home-ah pawh khan a inlan a ni.

'Brightest Blue' hi kum 2015-a a tlangzarh 'Delirum' album chhunzawmna tur a ni a, a album tlangzarh tawhte hi a hlawhtlinpui ṭhin hle.