Bollywood film sum lalut hnemte

Kum 1913-a Dadasaheb Phalke-a'n Hindi film, feature film hmasa ber (silent black and white) 'Raja Harishchandra' a tihchhuah aṭang khan Bollywood hi a ṭhang zel a, tunah phei chuan kum khat chhunga khawvel puma film tichhuak hnem ber a ni. Bollywood-in movie a tihchhuah tawh zawng zawng zingah Amir Khan channa, PK chu sum lalut hnem ber a ni.

A chhuah dawn khan sawiselna a nasa a, Hindu pawl, VHP chuan hmun ṭhenkhatah chhuah an phal lo hial. Hetiang a ni chung hian a hlawk em em hle a, India leh ram pawn aṭanga sum a hmuhchhuah zawng zawng hi cheng vbch 792 zet a ni tawh. An chhuah ṭan aṭanga Pathianni vawi thum a hmannaah cheng vbch 300 zet a hmu tling der tawh a, tun thlengin India ram chhung bikah cheng vbch 489 leh, India ram pawnah cheng vbch 303 hmu tling tawhin a sum lakluh tawh zawng zawng chu cheng vbch 792 a ni a, he film siam nana budget chu cheng vbch 85 a ni.

Salman Khan leh Kareena te channa Bajrangi Bhaijaan chu sum lalut hnem ber dawttu a ni a, tun thengin cheng vbch 626 a lalut tawh. Nikuma tihchhuah kha a ni a, Bollywood film zinga cheng vbch 300 lalut tling chak ber a ni. India ram chhungah cheng vbch 433 a lalut a, India pawn aṭangin cheng vbch 193 a thawk chhuak tawh bawk.

Aamir Khan leh Katrina Kaif channa Dhoom 3: Back in Action chu sum lalut hnem pathumna a tling pha a, India ram aṭangin cheng vbch 372 lalutin, ram pawn aṭangin cheng vbch 170 a lalut a, a sum hmuh chhuah tawh zawng zawng hi cheng vbch 542 a ni. India ram pawn aṭanga Bollywood movie sum lalut hnem ber a ni.

Shahrukh Khan leh Deepika Padukone te channa Chennai Express pawh sum lalut hnem ber berte zingah hian lang phain palina lai a tling thei a, cheng vbch 422 zet hmu chhuakin, heng zinga cheng vbch 301 chu India aṭanga a lakluh niin, cheng vbch 121 hi ram pawn aṭangin a ni. Prem Ratan Dhan Payo chu pangana a ni a, cheng vbch 399 lalutin, India aṭangin cheng vbch 305 leh ram pawn aṭang cheng vbch 93.7 a lalut.

Aamir Khan-a film bawk, 3 Idiots chu parukna a ni a, cheng vbch 395 a lalut a, Happy New Year chu pasarihna niin, cheng vbch 385 a thawk chhuak. Cheng vbch 381 hmu tling thei Dilwale chu pariatna a ni a, Kick chu pakuana niin Rs. vaibelchhe 377 a thawk chhuak a, Krrish 3 chu 10-naah lang phain Rs. vbch 374 a hlawh chhuak.