Zaninah 'Gabriel' tlangzarh dawn

Mizo Kristian film, 'Gabriel' chu zanin hian Vanapa Hall-ah tlangzarh a ni dawn. December 13 zan aṭangin Runmawi App-ah en theih turin chhawp chhuah a ni ang.

'Gabriel' hi Danny Vanchhawng ziah leh direct a ni a, assistant director hi Mikey Chhangte a ni. Videography leh editing hi Moonshine kutchhuak niin Runmawi produce a ni. Film director hi 'Black Rose' hlawhtling taka lo tichhuak tawh a ni a, tuna a film siam pawh hi a hmuhnawmin, zahpuiawm loh tak a ni.

A changtute hi Mizo film industry lama sulhnu ṭha tak tak lo nei tawhte an ni a, an role an hnehsawh tlang hlawm hle. Mizo film star kan neh ṭhat te - Ruthy Chenkual, Bena, Gosa, Vee Elly te bakah naupang duhawm tak Jothama te an inlan dawn. Inbuatsaih leh shooting nan hian thla hnih chhung vel hun hman niin, Aizawl hmun hrang hrang Tuikual North, Mission Vengthlang leh Trinity Hospital-ah an chang.

Director Danny Vanchhawng chuan, “Mizote hian film hrang hrang kan siam chho tawh a, a tam ber hi chu action movie, nula leh tlangval inngaihzawnna lam a ni. Family film ang hi kan nei tlem a, chuvang chuan he film hi chhungkua pawha enho theih leh en tlak tura buatsaih a ni. Tha leh zung kan seng nasa a, Pathian ṭanpuina pawh kan dawng nasa. Zo hnahthlak mipuite tan ennawm chu kan buatsaih ve tawkin kan hria,” tiin a sawi.

Runmawi App-ah hian Rs 250-in a lei theih dawn a ni.