Box Office : No. 1-ah Japanese movie 'The Boy and the Heron'

North American Box office-ah kar liam ta chhungin Hollywood studio liante'n film tlangzarh thar an neih loh chu Japanese animated movie, 'The Boy and the Heron' chuan vanneihpuiin, awlsam takin a chung ber dinhmun a rawn luah.

Japanese filmmaker lar, Hayao Miyazaki siam,'The Boy and the Heron' hian USD mtd 10.4 a la lut a, US box office-ah anime film zingah no. 1 ni thei pathumna a ni a, hei bakah kumin chhunga domestic box office-a foreign production zingah a chung ber dinhmun hauh thei hmasa ber a ni bawk.

'The Boy and the Heron' hi subtitle leh dubbed version siam niin, English-a dub-tu zingah hian Robert Pattinson, Christian Bale, Dave Bautista leh Mark Hamill te pawh an tel a, kumina animated movie chhuaka ṭha ber zingah chhiar tel a ni.

Beyonce Knowles concert movie, 'Rennaissance : A Film by Beyonce' chu tlangzarh karah no. 1-ah rawn lang mah se, a tlahniam chak hle a, a kar hnihnaah entu hi 77.1% zeta tlahniamin, no. 6-ah a tla thla nghal. 'The Hunger Games : The Ballad of Songbirds and Snakes' chu no. 2-ah a la ding nghet a, 'Godzilla Minus One' chuan dawtin, 'Trolls Band Together' leh 'Wish' te chu Top 5-ah an la lang bawk.