Sonia Gandhi'n mi retheite tan fund pe chhuak turin ngen
Congress party hruaitu Sonia Gandhi chuan nimin khan video message tichhuakin, sorkar laipui chu ram chhunga mi retheite ṭanpuina tur fund pe chhuak turin a ngen.
Sonia Gandhi chuan hripui leng vanga ram puma lockdown puan avangin nitina inhlawhfa ṭhinten hna an thawk chhunzawm thei lo a, mangan taka awmin anmahni state lamah mi sang tel chu kea hawte an awm tih a sawi. Heng mi harsa zawkte harsatna leh manganna tawh mek hi ram mipuiten an hriatthiampui laiin, sorkar laipui erawh chuan a hriatthiampui thiam lo a ni, a ti.
"India in zalenna a hmuh hnua a vawi khatna atan, inhlawhfa mi sang telte kein, rilṭam leh tuihalin, an in lam panin kawng thui tak an zawh laite kan hmu a ni. An natna, an manganna au ri te chu mipuiten kan hriat theih laiin, sorkar erawh chuan a hre ve si lo," tiin Congress hruaitu chuan a sawi.
Lockdown avanga hna thawh tur nei lo, chhungkaw retheite chu sorkar chuan thla ruk chhung atan chhawmdawlna, Rs 7,400 thla tin pe tura a phut thu leh; hmun danga inhlawhfa mahni in lama haw duhte hawna tur ngaihtuah sak thuai turin a phut tih a sawi bawk.