Mizo tlangvalte'n Rih Dil mawng an luh chhuak

Mizote rilrua tla na tak, a dil chhung chanchin ringawt pawh sawi dan tam tak kan neih, Rih Dil mawng chu Mizo tlangvalte'n an luh chhuak ta.

Dr. Lalmuanpuia, Bawng-kawn; C. Darthantluanga, Sairang leh PC. Lalnunzira (Zira PC) Thenzawl te chuan Rih Dil Expedition hi neiin, Inrinni liam ta, December 9 khan Rih Dil mawng lut thlengin, Zofate tan mellung pawimawh tak an siam ta.

Dil thukna lai ber nia rinah lutin, an tehna aṭang hian Rih Dil thuk zawng hi meter 12.3 (feet 40.35) a ni. Li mawng luh chhuaktu zinga mi, C. Darthantluanga hi technical divers 11 course zo tawh a ni a, Mizoram hmun hrang hrangah technical rescue lamah pawh a thawhhlawk hle. Zira PC hi YouTube lama kan hriat lar, adventure sports hmuhnawm tak tak rawn chhawp chhuak ṭhin a ni.

Rih Dil tehna atan hian diving computer, khawvel hmun danga an hman ang vek an hmang tih an sawi. Dil mawngah hian an kal kual bawk a,a vawh zawng hi 19*C a ni. Ril Dil expedition an neihnaah hian Myanmar lama mipui sipai, CDF-te'n an escort a, an chungah an lawm hle tih Zira PC chuan Vanglaini a hrilh. Project hmabak pawh eng maw zat an la nei tih a sawi bawk.