Taylor Swift 'Eras Tour' in World Record a siam

American singer-songwriter, Taylor Swift chuan Eras Tour hmangin world record a siam ta. Guiness World Record chuan 'Eras Tour' chu music tour sum la luh tam ber a ni tih official-in a puang a, a sum lak luh hi USD tluklehdingawn 1 a tling tawh.

Swift hian kumin March thla aṭanga a neih ṭan,'Eras Tour' hi nakkum December 24 thleng a nei dawn a, a tour chhung hian khawvel ram hrang hrangah show 151 a nei ang. Kumina a tour neih aṭangin USD tld 1.04 a la lut tawh a, hei hian tour aṭanga sum la lut tam ber record lo siamtu, Elton John sum lak luh a rawn khum der tawh a ni. Elton John hian farewell tour aṭangin USD mtd 939 a la lut a, he tour hi kum nga chhung neiin, ram hrang hrangah show 328 zet a nei. Swift hian a ruahman lawk anga nakkum lama show a la neih turte hi a neih tluan theih chuan, Eras Tour aṭanga sum lak luh hi USD tld 2 a tling thei dawn niin an chhut.

'Lover' singer Swift hian 'Eras Tour' ah hian show ṭum khatah darkar 3.5 chuang zel hun a hmang. Kumina a show neih tawh aṭanga chawhrualin, show ṭum khatah hian mi 72,000 zel kal ang an ni a, show tinah USD mtd 17 chuang zel la lut ang a ni bawk. Ticket man hi chawhrualin UD 238 a ni. Eras tour hian kumina tour sum la lut hnem pahnih, Beyonce leh Bruce Sprinteen-te sum lak luh belh khawm ai pawhin a la lut tam zawk a ni.

Swift hian a tour neihna bakah, kumin chhungin December 7 thleng khan a music hmang hian streaming royalty bakah track, digital album, CD, LP leh cassette a hralhna aṭangin USD mtd 536 a la lut bawk. Heta ṭanga 86% hi a label, Republic Records leh Big Machine Music Group catalog, Shamrock Capital-in an chang thung.

Grammy Award winner hi Time Magazine chuan 2023 'Person of the Year' atan a lo thlang tawh bawk a, Time editor-in-chief Sam Jacobs chuan Swift hi mi danglam bik a ni tiin, kum 2023-a music lama hlawhtlinna a neihte chu ngaihtuah phak bak a ni, a ti.