Google-in 2023-a search nasat list a tichhuak

Google chuan 'Year in Search 2023' list a tichhuak a, kum 2023 chhunga khawvel pum huapa Google-a zawn nasat zualte list a tarlang.

Kum 2023 chhunga khawvel huapa Google-a mihring search nasat ber chu NFL palyer Damar Hamlin niin Hollywood actor Jeremy Renner-a'n a dawt. Google hian category hrang hrang - actor, athlete, games, movie, musician, recipe leh song-ahte most search list hi a tichhuak bawk a ni.

Top 10 Google Most Search People 2023

1. Damar Hamlin - National Football League (NFL)-a American football player niin, kumin January thla khan an inkhelh laiin heart attack neiin a tlu a, damdawi in lamah hruai nghal a ni. Ni rei vak lo hnuah a rawn ṭha chhuak leh a ni. He thil thleng avang hian Google lamah a chanchin ngaihven an tam hle a, kumin chhunga mimal search nasat ber a ni ta a ni.

2. Jeremy Renner - Hollywood actor niin Avengers franchise-ah a chang. Kumin Kum Thar ni tak khan vur thenfaina, pound 14,330 vel zeta rit snowplow-in a chil avangin hliam na tak a tuar a, hmun 30-ah ruh tliak neiin, vawi tam tak zai a tawh phah.

3. Andrew Tate - social media personality, hmeichhia leh inlaichinna chungchanga comment huathlalaawm tak tak nei ṭhin a ni.

4. Kylian Mbappe - French footballer leh France National captain a ni.

5. Travis Kelce - National Football League (NFL)-a American football player niin, Taylor Swift nen an in-date hnuah mipui ngaihven a hlawh chho a, Google-a zawn nasat zingah a tel pha hial.

6. Jenna Ortega - American actress, Netflix series 'Wednesday' a chan hnuahngaihven hlawh ta a ni. Kum 21 mi, Ortega hi he series-ah hian Wednesday Addams lemah changin, Golden Globe, Primetime Emmy, leh Screen Actors Guild Awards-ahte nomination a hmu zui bawk.

7. Lil Tay - Internet personality leh musician a ni a, a instagram account-ah a thih thu puan a nih hnuah Google lamah a chanchin ngaihvena zawngtu an pung nasa hle. Mahse a hnuah a account chu hack-sak a ni tih an rawn sawi leh a ni.

8. Danny Masterson - American actor niin, kum 2003-a hmeichhe pahnih pawngsuala puhnaah thiam loh chantir a ni a, kum 30 tang tura hrem a nih hnuah Google-ah a chanchin ngaihventu an pung hluai.

9. David Beckham - English football palyer hlui niin, Netflix-ah a documentary tihchhuah a ni a, a hlawhtling hle a, hei vang hian Google lamah pawh search a hlawh phah lehzual a, top 10 list-ah a rawn lang pha ta a ni.

10. Pedro Pascal - Chilean and American actor niin, a channa post-apocalyptic drama series, 'The Last of Us' rawn lar chhoh avangin ani pawhin mipuite ngaihven a hlawh phah zui bawk.