Khiangte Construction Ṭhazual Lengzem : Ṭhazual Lengzem chart-ah Puipuia Chhakchhuak a sang ber

Khiangte Construction Ṭhazual Lengzem chart tharah Puipuia Chhakchhuak a sang ber a, 'Damlai Hringnun' chu pakhatna a rawn nihpui ta.

Puipuia hian he hla hi chart-ah hun eng emaw chen a lanpui tawh a, hma sawnpui zelin tunah chuan a chung ber dinhmun a rawn hauh thei ta a ni. He hla hi zaithiam lar ṭhin, TBC Lalramkima phuah niin, music video hi October 16 khan Puipuia hian a YouTube channel-ah a dah chhuak a ni. Recording hi HC Records-ah tiin, music video hi Tea Chhakchhuak siam a ni thung.

Apuii Chhangte pawhin 'Nang nghilh nan' tih chu chart hmasaa pathumna aṭangin pahnihnaah a rawn kaipui ve bawk. Pathumnaah rapper Marshall Fka Fanai 'Ka duhaisam' awmin, Mary Dawngi 'Sebonu' chu palinaah a lang a, Saka 'Ka hmangaih che' (Tunge i hming ost) chuan Top 5 a rawn khar.

Ṭhazual Lengzem chart tharah hian Puipuia, Mary Dawngi leh Marshall FKa-ten hla pahnih ṭheuh an lanpui thei a, Mawimawia chu a hmaa 10-na aṭangin pasarihnaah rawn chhoin, Dorothy Grance & Cungkip chu chart-ah an rawn lang thar ve bawk.