Kuminah USD mtd 500 la lut thei film 8 a awm

Kum 2023 a tawp dawn hnai ta, December thla chhung hian Hollywood film lian pariat tih chhuah hmabak a la awm a, hengte nen hian kumin chhungin box office hian USD tld 9 a la lut pha maithei. December 17 thleng khan box office sum hmuh hi USD tld 8.58 a tling tawh.

Kumina film tih chhuah zingah USD mtd 500 la lut pha film pariat awmin, USD mtd 400 la lut thei film 12 an awm bawk. Hit pahnih, Barbie leh The Super Mario Bros. Movie-te chu billion dollar la lut thei zingah an inziaklut bawk a ni.

Kum 2023 chhunga sum la lut tam ber, 'Barbie' director hi Greta Gerwig niin, hmeichhe solo director zinga worldwide box office-ah USD tld 1 la lut thei film nei hmasa ber a ni. Hollywood film zingah hian USD tld 1 la lut pha hi film 28 chiah awmin, heng zinga 'The Frozen' franchise leh 'Captain Marvel'-ah hmeichhe pahnih, Jeniffer Lee leh Anna Boden-te tel mah se, solo director ni loin co-director an ni thung.

'Barbie' hi record-breaker a nih rualin, khawvela film franchise hlawhtling ber, Marvel Cinematic Universe (MCU) pawh a che ṭha hle. Animator-tan kum ṭha a ni a, kumina sum la lut tam zual film 10 zingah animation pathum an lang thei.