Box Office-ah 'Wonka' in hma a hruai

North American box office-ah film lian release thar awm loh vanneihpuiin, musical fantasy film 'Wonka' chuan hma a rawn hruai.

Paul King direct movie hian US leh Canada-ah USD mtd 39 a la lut a, ram pawn lamah pawh a che ṭha viau. International-a a lak luh hi USD mtd 112.4 tlingin, tlangzarh kara khawvel huapa a sum hmuh hi USD 151.4 a tling a ni.

Timothee Chalamet channa, 'Wonka' hi Roald Dahl 1964 novel, 'Charlie and the Chocolate Factory'-a Willy Wonka chanchin a ni a, ticket leitu zinga 60% hi kum 18-34 inkar an ni. Critics review lamah pawh a hmu ṭha a, Rotten Tomatoes-ah 'fresh' rating 83% a hmu. A changtu Chalamet pawhin fak a hlawh hle. He film hi prequel niin, a hmain Willon Wonka character hi Gene Wilder leh Johny Depp-te pawhin an lo chang tawh bawk.

Kar hmasa lama No 1 hauhtu, Japanese film 'The Boy and the Heron' chuan a kar hnihnaah USD mtd 5.2 hmuh belhin, No 3-ah a tla thla. He film hi original anime production zingah box office-ah No 1 hauh thei hmasa ber a lo ni tawh a ni. Kar nga liam taa tlangzarh, 'The Hunger Games : The Ballad of Songbirds and Snakes' chuan USD mtd 5.8 hmuh belh lehin, No 2-ah a rawn chho leh thung.

Top 5-ah hian USD mtd 4.9 la luttu, Japanese production, sci-fi action film 'Godzilla Minus One' leh USD mtd 4 la lut 'Trolls Band Together' te an lang bawk a ni.