Marvel Studio-in Jonathan Majors an hnawl

Marvel Studios chuan an Marvels film an siam chhunzawm turah, Emmy nominated actor Jonathan Majors chu an hnawl. Hei hi kumin March-a a bialnu hlui, Grace Jabbari kut thlaka puh a nih chungchanga thiam loh chantir a nih vang a ni.

Thawhṭanni khan New Yoik court chuan kum 34 mi, Majors hi Jabbari kut a thlak chungchangah thiam loh a chantir a, hemi hnu hian Marvel thupuangtu chuan actor hi an thawhpui tawh dawn lo tih a puang zui ve bawk.

Majors hi Marvel film-a hian villain Kang the Conqueror lemah a chang a, Ant-Man and the Wasp : Quantumania leh, Disney+ series Loki ah pawh a chang bawk. Avengers: The Kang Dynasty-ah starring role chang tura tih a lo ni tawh a, hei bakah Avengers: Secret Wars-ah pawh a character ngai chang tura tih a ni bawk. Marvel Studio hian Majors hi an hnawl tak avangin, a thlaktu tur midang an zawng dawn nge, a character hi film aṭangin an paih zawk dawn hriat a la ni lo.