Blue Wave Records label hnuaiah Mizo zaithiamten Rs nuai 10 chuang la lut

Khawthlang ramte kalphung mila Mizorama mumal tala record label kalpui hmasa ber, Blue Wave Records label hnuaiah kumin chhungin Mizo zaithiamten an hla stream aṭangin Rs 10,93,960 zet an lalut thei.

Blue Wave Records hian India rama Spotify an luh hma aṭang tawhin Mizo ten streaming platform an hmelhriat leh hman ṭangkai theih dan tur an lo buaipui tawh a, an hmalakna zarah hmasawnna nasa tak a rawn awm chho ta a ni. Zaithiamte kawng kawhhmuhin, anmahni sum sengin an hlate streaming platform-ahte an lo dahsak tawh ṭhin. Tunah hian distrochemy leh midangte an thawhpui mek a ni.

Kalphung mumal tak neiin, zaithiam eng emaw zatin an label hnuaiah dahin an vil zui sak a ni. Streaming platfom hrang hrang - spotify, apple music, amazon music, youtube music, instagram, facebook, tidal leh a dangahte an hla hi dahsakin, zaithiamte buaipui ngai loin copyright-te an buaipui sak bawk. Royalte hi email leh thildang hmangin zaithiam leh hla neitu hnenah mumal tak leh awlsam tak siin a luang lut tawh a ni. Zaithiamte chanvo hmuh theih nan theihtawpin hma an la a, YouTube lama an hla lo hmangte pawh zaithiamten an hlawkpui theih nan hma an laksak zui bawk ṭhin.

Blue Wave Records neitu leh producer, Bza Sailo chuan, "Mizo music industry streaming platform lamah hma kan sawn a, streaming eng nge tih zawhna ka dawn hunlai nen chuan a inthlau tawh tak zet," tiin hmasawnna an hmuh avanga a lawm thu a sawi. Hemi rual hian zaithiamte chu dawhtheihna an neih a pawimawh thu sawiin, streaming chu inkhaidiat a awm avangin a tirah sum a che vut vut lo a, mahse a awmzia hriata ngaihchan peih chuanYouTube ringawt aiin sum lakluh a ṭha zawk a, hei hi artist ṭhenkhat pawhin an hrechiang tawh viau tih a sawi. Artist development hi an kalpuina a rei tawh a, zaithiam pawh an chher chhuak nual tawh bawk. Zaithiam hi hit tir nghal an tum lo a,an hlawhtlinna tana kawng hmasa zai dan kalhmang dik,awmze neia zai theih, autotune ngai loa zai an thupui lian ber pakhat a ni.