MPL10 final-ah Hmangaihi a zai dawn : Closing ceremony host tur Zorinpuii Hlawndo

izoram Football Association leh Zonet buatsaih Zote Toyota MPL10 final chu zanin hian a hmawr bawk a ni dawn a, final-ah vawi hnih champion tawh Chanmari FC leh Mizoram Police FC te an inkhel dawn.

Tualchhung football tui chin tan hunpui a ni a, local football hunpuiah hian Mizo Idol Hmangaihi a zai dawn. Hunthar nula Hmangaihi hi nikuma neih Mizo Idol Season 7-ah khan pakhatna a ni a, inelna neih zawhah reh zui mai loin a lar zui hle.

Ṭhazual Award-ah Hmangaihi hian hming a chher belh a; Mangṭha mai le, Hmangaihna khingbai, Ka chelh ding lo'ng che, Ṭahkhua tiseitu, I awm tlat si tihte chu a larpui. MPL10 final-ah hian inelna ṭan hmain 'Ro min relsak ang che' tih a sa dawn a, halftime laiin a zai bawk ang.

MPL final-ah hian host ṭhahnem tak an awm tawh a, hriat an hlawh ṭhin hle. Tun ṭuma host tur hi Zorinpuii Hlawndo (Tetei) a ni a, Tetei tia hriat lar a ni. Upper Republic nula Tetei hian ama pualin Zonet show a nei a, 'Hmaichhan' programme tih niin politcal leh social issue lam a ni thung.

Tetei tuina hi political journalism ni mah se football fan a ni a, Barcelona ṭantu niin tualchhung football lam pawh a tuipui viau. Zanin hian Sangsangi, Sabina, Zamzami leh Angelina te hnung zuiin MPL10 closing ceremony a host dawn a ni.