YouTube-ah subscriber ngah ber T-Series ; Mimalah MrBeast bawkin hma a la hruai

Khawvel huapa YouTube subscriber ngah ber chu mipui nawlpuiin kan rin loh lam daih, Bollywood hla leh snippet tichhuak ṭhin, T-Series a ni.

Khawvela mihring tamna ber ram, India mipuiin an ngaihven zawng chuan khawvel huap pawha record siam a awl deuh a ni ang, T-Series pawh Mizo nawlpuiin kan hriat leh ngaihven lam ni lo mah se, an YouTube channel hian subscriber mtd 225 neiin, khawvela subscriber ngah ber a ni. Indian record label leh film production powerhouse hian kum 2006, March 13 khan channel hi an siam a, video hi 19,000 chuang an dah tawh. Music video bakah movie trailer leh interview-te an dah tel ṭhin bawk. YouTube subscriber ngah zual 10 zingah hian India ram aṭangin a dang pahnih pawh an lang bawk.

YouTube-a subscriber ngah ber dawttu chu Mizo pawhin kan hriat lar, MrBeast tia hriat, Jimmy Donaldson a ni. Mimalah subscriber ngah ber ni chhunzawm zelin, YouTuber hausa ber zingah pawh a tel. Kum 2012, February 20 khan a channel hi a siam a, subscriber hi mtd 220 zet a nei tling tawh.

Subscriber ngah pathumnaah hian naupangte'n an lawm em em, Cocomelon channel a awm. He channel hi a hlimawm rualin naupang zirtirnate pawh dah telin, nursery rhymes te an dah bawk. Naupangte lawm turin color lar tak tak an hmang a, music catchy tak leh ṭawngkam pawh simple tak an hmang ṭhin. An hla tihchhuah zinga mi, 'Bath Songh' chuan view tluklehdingawn 5 chuang zet a nei tawh. Kum 2006, September 2 khan an channel hi an siam a ni.

No. 4-ah India ram aṭangin Hindi entertainment channel, Sony Entertainment Television langin, subscriber mtd 166 an nei. Drama leh reality show tihchhuahna, SET channel hi kum 2006-a an siam niin, khawvel huapa YouTube channel view hlawh zual zingah a tel. Top 5-ah hian naupang pual, English-language series Kids Diana Show channel chu a lang bawk. Hmeichhe naupang Diana leh a nuṭapa Roma-te infiamna video te dahin, naupang lawm a hlawh hle a, ṭawng 20-a dub a ni. He channel hi kum 2015, May 12-a an siam kha a ni.