Box Office : 'Wonka' in No. 1 ni chungin 2023 a khar

North American box office-ah kum 2023 chu 'Wonka' in a chung ber dinhmun hauhin a khar. Paul King-a musical fantasy film hian a kar thumnaah USD mtd 22.7 a lak luh belh leh a ni.

Timothy Chalamet channa hi a kar thumnaah ticket sale 25.6%-a rawn pung lehin, North America-ah USD mtd 104.2 a la lut tawh a, khawvel huapa a sum lak luh hi USD mtd 400 a tling tawh.

Box office-a 'Wonka' a rawn invawrh chho leh laiin, "Aquaman and the Lost Kingdom" chu no. 2-ah a tla thla thung. A kar hnihnaah 'Aquaman' sequel hian USD mtd 18.3 la lutin, ticket sale hi 34%-in a tlahniam a ni.

Universal and Illumination animated adventure comedy, 'Migration' chu no. 3-ah a awm a, USD mtd 17 la lutin, khawvel huapa a sum lak luh hi USD mtd 105.6 a tling tawh bawk. no. 4-ah newcomer, 'The Color Purple' a rawn lang a, tlangzarh karah USD mtd 11.7 a la lut a ni. Critics lam aṭang pawhin review a hmu ṭha viau. Top 5 chu R-rated romantic comedy 'Anyone But You' in a rawn khar a, he film-ah hian Sydney Sweeney leh Glen Powell te an chang a, USD mtd 8.8 an hmuh belh leh a ni.