Billboard 200 : Kar 5 chhung no. 1-a awm thei 1989 (Taylor's Version)

Billboard 200 album chart-ah kar liam ta khan Taylor Swift '1989 (Taylor's Version)' chu no.1-ah awm lehin, a zawn loin chart hmahruaitu hi kar nga chhung a ni tawh a ni.

'Anti-Hero' hitmaker hian soloist zinga album chart-a no. 1 ni ngun ber, Elvis Presley (kar 67 chhung) record siam chu a khum a, a album hrang hrangte chu No 1-ah kar 68 a lanpui thei a ni. Hetih lai hian musician zingah no. 1-a awm rei ber chu The Beatles an la ni a, kum 1964-2001 inkar khan an album-te chu kar 132 chhung no. 1-ah an lanpui a ni.

'1989 (Taylor's Version)' hian 2023 December chawlhkar tawpah equivalent album unit 98,000 a neih belh leh a, album sales unit 61,000 a nei bawk. Swift hian chart-ah album pahnih a la lanpui thei a, 'Midnight' chu no. 9-ah a awm bawk.

December chawlhkar tawp chart-ah no. 2-ah Michael Buble 'Christmas' chu no. 4 aṭangin no. 2-ah a rawn chho a, equivalent album unit 78,000 a nei. Kum hnih chhunga he album-in chart-ah a thlen san ber ṭum a thleng. No. 3-ah Nicki Minaj 'Pink Friday 2' awmin, equivalent album unit 66,000 a nei.

Chart-ah Krismas album an la lang nual a, no. 4-ah Nat King Cole 'The Christmas Song' awmin, classic multi-artist holiday album, 'A Christmas Gift for You From Phil Spector' chu no. 7-ah, Mariah Carey 'Merry Christmas' chu no. 8 leh, Pentatonix 'The Greatest Christmas Hits' chu no. 10-ah an lang.

No. 1 dinhmun pawh lo hauh tawh, hun rei tak chart luah lum tawhtu, Morgan Wallen 'One Thing At a Time' chu no. 5 leh Drake 'For All the Dogs' chu no. 6-ah an la awm bawk.