Minecraft movie-ah Jack Black chang dawn

Video Game adaptation, Jason Momoa channa tur 'Minecraft' movie-ah Jack Black pawh a chang ve dawn tih amah ngeiin a sawi chiang ta.

The Super Mario Bros Movie star, Jack Black hi Minecraft-ah hian Steve lemah a chang dawn a, amah ngei hian a Instagram lamah 'Minecraft Basic for Dummies' bu a chhiar lai thlalakte a rawn dah lang. Mahse he film plot erawh puanzar a la ni lo a, script-writer -te pawh an la sawi lang duh lo. A changtu tur zingah hian Emma Myers, Danielle Brooks leh Sebastion Eugene Hansen-te pawh an tel a, 2025 April thlaa tihchhuah tum a ni. Minecraft hi sandbox game, Markus Persson siam niin, kum 2009 khan an tichhuak a, nikum khan khawvel pumah he game khel hi mi maktaduai 100 chuang an awm. Gaming history-ah video games hralh tam zingah a tel a, copy maktaduai 300 chuang an hralh tawh.