2023 UK single chart-ah hmeichhiate'n record an siam

Kum 2023 chhungin UK single chart-ah hmeichhe artist-te an che ṭha a, kum 1952 hnua top chart-a hmeichhiate an lan ngun ber ṭum a ni.

2023-a kar 52 chhungin hmeichhe artist-te'n kar 31 chhung chart chung ber dinhmun an luah thei a, solo ang leh musician dang an thawhpuite nen te an lang.

UK-ah Miley Cyrus hla, 'Flowers' chu hla stream nasat ber niin stream mtd 198 a nei. British Phonographic Industry (BPI) chuan kum 2023-a hla tihchhuah zingah 'Flowers' chauh hi double platinum certified awmchhun niin a tarlang a, chart unit mtd 1.2 a nei pha a ni. Nikum chhunga album tihchhuah zingah platinum disc, sales 300,000 nei pha an awm lo. Kum 2003 khan platinum disc nei pha hi album 51 zet an awm a ni. BPI chuan kum 2023 chu hmeichhe artist-te tan hun ṭha tia tarlangin, UK-a best-selling song Top 10 zingah hmeichhia pasarih an lang bawk a ni.